Аның сүзләренчә, кайбер гадәтләр баланың мошенниклар йогынтысына эләгүен күрсәтергә мөмкин.

Телефон һәм банк картасына игътибар итәргә кирәк

Омбудсмен балаларның телефонын яшерүенә яки аны экран белән аска каратып куюына, телефонны еш блоклавына, банк картасын гадәттәгедән активрак куллануына игътибар итәргә киңәш итте. Мессенджерларда моңа кадәр булмаган сәер каналларга язылу да борчылу өчен сәбәп булырга мөмкин.

«Иң мөһиме — иртә ачыклау. Бала кинәт телефонын экран белән аска куя башлый, үз телефонын блоклый, банк картасын бик актив куллана яки сәер каналларга языла башлый», — дип сөйләде Львова-Белова журналист Владимир Соловьевка биргән интервьюсында.

Балаларны җинаятькә ничек җәлеп итәләр?

Львова-Белова сүзләренчә, балалар мошенникларның йогынтысына ешрак эләгә. Аларны тиз акча эшләү мөмкинлеге белән кызыктырырга яки ялган ярдәмендә ышанычка керергә мөмкиннәр. Шуннан соң бала җитди җинаять эшләренә җәлеп ителергә мөмкин.

Омбудсмен ата-аналарга балалар белән ышанычлы мөнәсәбәтләр урнаштырырга һәм аңлашылмаган хәлләр килеп чыкканда ярдәм сораудан курыкмаска кирәклеген аңлатырга киңәш итте.

«Мин сине һәрвакыт аңлармын»

Мария Львова-Белова фикеренчә, ата-аналарның төп бурычы — балага теләсә нинди шикле ситуация турында курыкмыйча сөйләргә мөмкин булуын аңлату.

«Без аларга сөйләргә һәм ярдәм итәргә тиеш: теләсә нинди аңлаешсыз ситуациядә син миңа ышанырга тиеш, сөйләргә тиеш. Мин сине һәрвакыт аңлармын, диеп әйтегез», — дип билгеләде ул.

Аның сүзләренчә, балалар һәрвакыт ситуацияне критик бәяли алмый. Шуңа күрә ата-аналар һәм педагоглар баланың үз-үзен тотышындагы үзгәрешләргә вакытында игътибар итәргә тиеш.

Балалар өчен киберҗинаятьчелеккә каршы видеолар әзерләнә

Балалар омбудсмены аппараты «Бердәм Россия» партиясе белән берлектә киберҗинаятьчелеккә каршы тору турында видеороликлар сериясе әзерли.

Материалларда балаларны террорчылык эшчәнлегенә һәм мошенниклык схемаларына җәлеп итү ысуллары, шулай ук мондый куркынычлардан саклану юллары турында сөйләнәчәк.