Хезмәт, халыкны эш белән тәэмин итү һәм социаль яклау министры Эльмира Зарипова Төбәк белән идарә итү үзәгендә узган туры эфирда шул хакта белдергән. “Мәшгульлек дәрәҗәсе бик зур, икътисадта 2 миллион 43 мең кеше эшли.

Соңгы елларда тагын 65 меңләп кешене эшле иттек. Гаять югары күрсәткеч бу. Хәзерге вакытта мәшгульлек дәрәҗәсе – 62% чамасы.

Без бу җәһәттән Идел буе федераль округында лидерлар өчлегенә керәбез. Әлбәттә инде, әлеге күрсәткеч ил буенча уртачадан югарырак”, – дип сөйләп үткән ул. Хәзерге вакытта эш бирүчеләр 86 мең вакансия тәкъдим итә.

Шул ук вакытта 3800 кеше эшсезлек буенча исәптә тора.

“Бүген мәшгульлек үзәгендә исәптә торучы һәр эшсезгә 22-23 вакансия тәкъдим итә алабыз, дигән сүз бу. Хезмәт хакы – шактый ук югары”, – дип билгеләп үткән Зарипова.

Бүгенгә эшкәртү комплексы предприятиеләре төбәкнең хезмәт базарында 27 мең вакансия тәкъдим итә. 20 меңнән артыграк вакансия төзелеш һәм торак-коммуналь өлкәләренә туры килә. 6,5 меңнән күбрәге бюджет өлкәләренә, шул исәптән сәламәтлек саклау һәм мәгариф өлкәләренә карый. Транспорт предприятиеләренә – 1 меңнән артыграк, авыл хуҗалыгына – 1,2 мең эшче кирәк.